بخصوص حادث كمين العريش صباح اليوم...
في المصطلحات العسكرية يقولك مصطلح Command and Control system او C2 أو التحكم و السيطرة وهو عبارة عن توظيف أجهزة وموارد بشرية للتواصل بين الوحدات القتالية بحيث إنها تبقى متوصلة ببعض وتتحرك للتعامل مع تحدي ما بتنسيق مشترك . ده إللي بيفرق كفاءة جيش عن جيش لدرجة بيقولك إن ضرب مراكز القيادة و السيطرة دي في الجيوش بمثابة تفكيك للجيش وعزله عن بعضه وتحويله لقوات غير منتظمة.
لازم تحافظ على مراكز التحكم و السيطرة دي في كامل كفاءتها علشان تكسب حرب. وفي الحروب غير النظامية زي الحرب على الارهاب مراكز التحكم و السيطرة دي بتبقى بكامل لياقتها لأنها في الغالب في منطقة بعيدة عن استهداف الميليشيات الغير نظامية إللي ما عندهاش طيران يقصف المراكز دي عن بعد. ومن علامات كفاءة مراكز التحكم و السيطرة دي إن مفيش تمركز قتالي ممكن يقاتل لوحده لفترة طويلة لأن أول ما بيتهاجم بيرصد نطام التحكم و السيطرة الهجوم وبيوجه قوات تانية سواء جوية أو برية إنها تدعم التمركز القتالي ده.. إللي عرفناه إن الكمين إللي تم استهدافه في سينا فضل يقاتل نص ساعة لغاية ما ذخيرته خلصت دون تدخل سريع يدعم الكمين. ودي مش أول مرة تحصل ده إحنا بقى لنا سنين على الحال ده.. ده بيقول إن في أزمة تحكم وسيطرة وفي حالة انعزال بين كتير من الكماين الأمنية بحيث إنها المفروض تقاتل لوحدها لمدة تزيد عن ساعات على ما تبدأ قوة نيران فعالة تتدخل زي ما حصل في الكمين الاخير إن فعلا الطيران الحربي بدأ يتدخل لكن بعد الموضوع بكام ساعة..
