معارض للإخوان يستعرض 11 فرقا بين "مرسي" و"السيسي"

اضغط للتكبير

الرئيس د.محمد مرسي وقادة الانقلاب العسكري

27/07/2016 07:46 م

كتب يوسف المصري:

تداول نشطاء عبر مواقع التواصل الاجتماعي منشورا مطولا لـ"محمد الجيزاوي" أحد معارضي الإخوان والرئيس مرسي خلال فترة حكمه، يعقد خلاله مقارنة بين الرئيس مرسي وقائد الانقلاب العسكري عبدالفتاح السيسي.

وبدأ الجيزاوي منشوره بتعريف نفسه، بأنه يعتبر طوال عمره أن الإخوان خصومه السياسيين، وأن متابعيه يعرفون عنه ذلك جيدا، لكن  ذلك لا يمنع من الإنصاف، حسب قوله.

واستعرض الجيزاوي خلال مقارنته بين الرئيس مرسي والانقلابي السيسي، الفارق بين الأوضاع الاقتصادية في كلا العصرين، وسقف  الحريات العامة، والاستغلال الديني في كلا العصرين، والفرق في أوضاع المصريين قبل الانقلاب وبعده، وكيف كانت سياسية الرئيس مرسي الخارجية، وكيف أصبحت سياسية قائد الانقلاب الفاشلة.

وجاءت المقارنة بين الرئيس مرسي والانقلابي السيسي في 11 نقطة كالآتي "كما أوردها في تدوينته على "فيس بوك":

1- الإخوان فى السنة اللى حكموها وصل سقف الحريات لأعلى مستوى فى تاريخنا.. يا أخى دة أى اعلامى وسخ كان بيطلع يلعن سلسفين مرسى ومحدش يقوله انت رايح فين.. بينما السيسى قفل برنامج باسم يوسف وسرح يسرى فودة وكل صوت معارض ومبقاش موجود غير قوادين على شاكلة خيرى رمضان وأحمد موسى ولميس وشلة النعاج الإعلامية.

2- مرسى كان لو واحد مراته زودت الملح فى الأكل كان ينزل يعتصم فى التحرير ويقفل الشوارع، ومع ذلك محدش انضربت عليه رصاصة، وفى خلال السنة وفى أعتى الاشتباكات لم يقتل أحد وعلى أقصى تقدير اللى ماتوا لا يتجاوزون أصابع اليد الواحدة عددا، بينما السيسى صباح الخير بتاعته بتبقى مجزرة يموت فيها المئات.

3- مرسى حصل فى عهده عملية أو اتنيين إرهابيتين لا أكثر، بينما البرنس السيسى الجيش المصرى قرب يخلص على ايد الإرهابيين.

4- مرسى اللى قلنا عليه رئيس ضعيف كانت الدول بتعمل حسابه وإسرائيل وقفت ضرب غزة بعد كلمة منه، بينما السيسى الرئيس القوى الملك عبدالله استخسر ينزل من الطيارة وبعتله يجيله لحد طيارته ويقعد على كرسى الحمام قدامه بعد ما باس راسه.

5- مرسى كانت كل دول الخليج مش عاوزاه باستثناء قطر، والإضرابات فى كل مكان والمؤسسات الرسمية بتتآمر عليه، ومع ذلك الدولار مزادش ولا حتى ربع جنيه، بينما السيسى كل دول الخليج بتديله مليارات وكل مؤسسات الدولة بتلحس جزمته ومع ذلك الدولار تجاوز 12 جنيها.

6- فى عهد مرسى كل المرتبات بلا استثناء زادت، سواء القضاة أو أساتذة الجامعة أو المعلمين أو الأطباء أو حتى الشرطة.

فى عهد السيسى الناس بتاخد بالجزمة ومحدش بيزيد قرش، واللى يتكلم يتهموه إنه إخوان ويتسرح من وظيفته، وكلاب الإعلام يقولوا الناس لاااازم تستحمل، واللى حطو فلوسهم فى القناة الجديدة قالولهم "امك فى العش ولا طارت"، ومع الضنك العام كل يووووم الجيش والشرطة والقضاء مرتباتهم بتزيد.. وباقى الناس بتسف تراب.

7- فى عهد مرسى كنا بنعترض إن دجالين القنوات الدينية بيقولو عليه رجل صالح.. إنما انهاردة دجالين الأزهر بيقولوا عليه إنه نبى الله موسى وإنه مفوض السماء، وسكرتير البابا فى الكنيسة قال إن شاف يسوع المسيح داخل جنب السيسى.. ومحدش قالهم بلاش دجل ولعب على أوتار الدين ولا شفنا إعلامى واااحد اعترض.

8- فى عهد مرسى الرئيس بنفسه راح جاب البنت الصحفية من السودان لما اختطفوها وجابها على طيارته، وفى عهد السيسى احنا بنتخطف من بيوتنا والمصريين بيتداس عليهم بالعربيات فى الكويت وبينضربو بالكرباج من الكفيل، ومحدش حتى فى القنصليات بيتحرك فضلا عن الخارجية والرئاسة.

9- مرسى فى السنة اللى قضاها ورغم تلفيق ألف ألف قضية للإخوان لكن مفيش كلب جرؤ يقول إن مرسى أو أى وزير فى حكومته سرقوا جنيه واااااحد.. ومعليهمش ولا قضية فساد، بينما السيسى كله رجالته شيوخ منصر والفساد بقى للركب.. ومحدش عارف المليارات دى كلها بتروح فين.

10- مرسى رغم كل الضغوط اللى كانت عليه لكن كان بيطور وفى مشاريع حقيقية وأسعار السلع كلها كانت معقولة جدا، وفاكهة زى المانجة وصلت أربعة جنيهات، بينما السيسى بملياراته اللى شحتها من الخليج واللى تجاوزت 80 مليار غير التبرعات الداخلية غير الهدوء اللى فى البلد، ومع ذلك سعر كيلو الليمون وصل أربعين جنيها، والبانية 80 جنيها، وكل يوم فى زيادة أسعار بشكل جنونى والبلد فلست ومبقاش عندنا دولار واحد يغطينا فى البنك المركزى.. والبلد قلعت مللللللللط بكل معانى الكلمة.

11- أيام مرسى كنت ممكن أكتب بوست زى دة أهاجمه فيه، وبعدها أروح اقعد ع القهوة واشيش واضحك واروح انام وانا فى بطنى بطيخة صيفى.. إنما دلوقتى فى عهد السيسى بكتب كل كلمة وبعدها بقول "اللهم إنى أستودعك زوجتى وأبنائى".